EP. 12 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人pha-kheh-su̍h-to͘h，真歡喜koh hâm ta̍k-ke tī空中再相會！
Eh，少年--ê！
Haⁿh？等--leh，你是有siáⁿ企圖hio͘h？Nah ē hiông-hiông叫我少年--ê？
無--lah，to̍h叫--1-ē試看--leh，因為我tiāⁿ leh hông講是少年輩--ê。
Hăⁿ，你明明to̍h beh--ah，siáⁿ-mih少年--ê，beh歲ê o͘-chí-sáng--ah neh！
Ăi，是án-chóaⁿ你ài一直強調hit ê數字，kám是kah我有siáⁿ冤仇？
好--lah，我to̍h mài koh一直講你beh~~歲--ah！是講你是án-chóaⁿ ē去hông叫少年輩--ê？
我teh講chhui-sak台語文ê團體--lah！Tī團體內我有影mā有khah少年，看看--leh比我khah少年--ê mā無jōa chē人，有時想--khài，心內mā是淡薄á稀微。
Che to̍h是台語斷chàn ê情形kài嚴重，咱to̍h ài khah piàⁿ--leh，ke kho͘ kóa人來做伴，咱ê母語chiah ē繼續代代thòaⁿ。
當然--nò͘，一定ài--ê好--無，咱等--leh chiah繼續開講，先奏音樂hoⁿh？
Nó͘-pha-put-lián，請奏音樂。
Ĕ，chit句a̍h hō͘你學去！
Ke講--ê！我hiah-nī khiáu！
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng pha-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Eh, siàu-liân--ê!
Haⁿh? Tán--leh, lí sī ū siáⁿ khì-tô͘ hio͘h? Nah ē hiông-hiông kiò góa siàu-liân--ê?
Bô--lah, to̍h kiò--1-ē chhì-khòaⁿ--leh, in-ūi góa tiāⁿ leh hông kóng sī siàu-liân pōe--ê.
Hăⁿ, lí bêng-bêng to̍h beh--ah, siáⁿ-mih siàu-liân--ê, behhòe ê o͘-chí-sáng--ah neh!
Ăi, sī án-chóaⁿ lí ài it-ti̍t kiông-tiāu hit ê sò͘-jī, kám sī kah góa ū siáⁿ oan-siû?
Hó--lah, góa to̍h mài koh it-ti̍t kóng lí beh~~歲--ah! Sī kóng lí sī án-chóaⁿ ē khì hông kiò siàu-liân pòe--ê?
Góa teh kóng chhui-sak Tâi-gí ê thoân-thé--lah! Tī thoân-thé lāi góa ū-iáⁿ mā ū khah siàu-liân, khòaⁿ khòaⁿ--leh pí góa khah siàu-liân--ê mā bô jōa chē lâng, ū-sî siūⁿ--khài, sim-lāi mā sī tām-po̍h-á hi-bî.
Che to̍h sī Tâi-gí tn̄g chàn ê chêng-hêng kài giâm-tiōng, lán to̍h ài khah piàⁿ--leh, ke kho͘ kóa lâng lâi chò-phōaⁿ, lán ê bó-gí chiah ē kè-sio̍k tāi-tāi thòaⁿ.
Tong-jiân--nò͘, it-tēng ài--ê hó--bô, lán tán--leh chiah kè-sio̍k khai-káng, seng chàu im-ga̍k hoⁿh?
Nó͘-pha-put-lián, chhiáⁿ chàu im-ga̍k.
Ĕ, chit kù a̍h hō͘ lí o̍h khì!
Ke kóng--ê! Góa hiah-nī khiáu!
EP. 12 片尾
Beh講我是少年--ê mā ē-sái--lah！我chit-má chiah 5歲niâ！
你明明to̍h beh~~--ah，koh beh騙，你án-ne是欺騙社會neh！
好--ah-lah，che消音--ê sńg kah siuⁿ chē遍，觀眾ē笑bē出--來-lah！
Mā有影，ah he 5歲是án-chóaⁿ講？
Chit ê 5歲到底是我ka-tī發明--ê，a̍h是講bat聽過人án-ne鼓chhui，我已經記bē khaih。To̍h是講我ē-hiáu寫台文已經5 tang--a，che對我來講chiâⁿ有意義，我一直lóng ē-hiáu講台語，m̄-koh bē-hiáu寫，我ē-hiáu寫英文，日文，中文，to̍h是bē-hiáu寫台文，進前完全m̄知影咱ê台語有文字thang寫。Ē-hiáu寫了後，我khah感覺我是1 ê完整ê人，to̍h ná親像基督教teh講ê koh活，só͘-pái，有時我mā ē滾笑講我ka-tī 5歲。
是án-ne--o͘h！Án-ne nā照你ê理路，我chit-má算是3歲，我mā想tio̍h我tú ē-hiáu寫ê時有jōa歡喜，學tio̍h 1 ê m̄-bat ê詞，to̍h感覺kài趣味。
其實我bat怨嘆講，我nah ē hiah慢chiah知影台語有字thang寫！Ē-tàng講，bē-tàng寫，真正kài奇怪，tio̍h--無？M̄-koh我活到40 gōa，lóng m̄-bat憢疑過chit件tāi-chì neh，活tī chit ê種花民國，siáⁿ奇怪ê tāi-chì to̍h ē變kah真正常án-ne，顛倒你感覺奇怪ê時，人ē來懷疑你無正常。
其實chit-má是有看tio̍h jú來jú chē少年--ê開始beh來學，beh來做夥chhui-sak台語文，che是kài好ê現象，我真希望我ē-hiáu寫字hit年，to̍h是chit粒島嶼台語siāng暗淡ê時，koh來to̍h ē一直好--起-來án-ne。
我mā kah你有kāng款ê ǹg望，一定ài ná來ná好！咱今á日節目ê時間mā差不多--a，真歡喜咱今á日各位聽眾朋友做夥來參與，後禮拜kāng時間請koh來捧場，goán ê節目聽tio̍h nā bē-bái，請kā goán tàu紹介朋友做夥來聽ŏ͘，真勞力！真感謝！Ta̍k-ke再會！
Beh kóng góa sī siàu-liân--ê mā ē-sái--lah! Góa chit-má chiah 5 hòe niâ!
Lí bêng-bêng to̍h beh~~--ah, koh beh phiàn, lí án-ne sī khi-phiàn siā-hōe neh!
Hó--ah-lah, che siau-im--ê sńg kah siuⁿ chē piàn, koan-chiòng ē chhiò bē chhut--lâi-lah!
Mā ū-iáⁿ, ah he 5 hòe sī án-chóaⁿ kóng?
Chit ê 5 hòe tàu-té sī góa ka-tī hoat-bêng--ê, a̍h sī kóng bat thiaⁿ-kòe lâng án-ne kó͘-chhui, góa í-keng kì bē khaih. To̍h sī kóng góa ē-hiáu siá Tâi-bûn í-keng 5 tang--a, che tùi góa lâi kóng chiâⁿ ū ì-gī, góa it-ti̍t lóng ē-hiáu kóng Tâi-gí, m̄-koh bē-hiáu siá, góa ē-hiáu siá Eng-bûn, Ji̍t-bûn, Tiong-bûn, to̍h sī bē-hiáu siá Tâi-bûn, chìn-chêng oân-choân m̄ chai-iáⁿ lán ê Tâi-gí ū bûn-jī thang siá. Ē-hiáu siá liáu-āu, góa khah kám-kak góa sī 1 ê oân-chéng ê lâng, to̍h ná chhin-chhiūⁿ Ki-tok-kàu teh kóng ê koh oa̍h, só͘-pái, ū-sî góa mā ē kún-chhiò kóng góa ka-tī 5 hòe.
Sī án-ne--o͘h! Án-ne nā chiàu lí ê lí-lō͘, góa chit-má sǹg sī 3 hòe, góa mā siūⁿ tio̍h góa tú ē-hiáu siá ê sî ū jōa hoaⁿ-hí, o̍h tio̍h 1 ê m̄-bat ê sû, to̍h kám-kak kài chhù-bī.
Kî-si̍t góa bat oàn-thàn kóng, góa nah ē hiah bān chiah chai-iáⁿ Tâi-gí ū jī thang siá! Ē-tàng kóng, bē-tàng siá, chin-chiàⁿ kài kî-koài, tio̍h--bô? M̄-koh góa oa̍h kàu 40 gōa, lóng m̄-bat giâu-gî kòe chit kiāⁿ tāi-chì neh, oa̍h tī chit ê chèng-hoe bîn-kok, siáⁿ kî-koài ê tāi-chì to̍h ē piàn kah chin chèng-siông án-ne, tian-tò lí kám-kak kî-koài ê sî, lâng ē lâi hoâi-gî lí bô chèng-siông.
Kî-si̍t chit-má sī ū khòaⁿ tio̍h jú lâi jú chē siàu-liân--ê khai-sí beh lâi o̍h, beh lâi chò-hóe chhui-sak Tâi-gí-bûn, che sī kài hó ê hiān-siōng, góa chin hi-bāng góa ē-hiáu siá-jī hit nî, to̍h sī chit lia̍p tó-sū Tâi-gí siāng àm-tām ê sî, koh lâi to̍h ē it-ti̍t hó--khí-lâi án-ne.
Góa mā kah lí ū kāng-khoán ê ǹg-bāng, it-tēng ài ná lâi ná hó! Lán kin-á-ji̍t chiat-bo̍k ê sî-kan mā chha-put-to--a, chin hoaⁿ-hí lán kin-á-ji̍t kok-ūi thiaⁿ-chiòng pêng-iú chò-hóe lâi chham-ú, āu-lé-pài kāng sî-kan chhiáⁿ koh lâi phâng-tiûⁿ, goán ê chiat-bo̍k thiaⁿ tio̍h nā bē-bái, chhiáⁿ kā goán tàu siāu-kài pêng-iú chò-hóe lâi thiaⁿ ŏ͘, chin ló͘-la̍t! Chin kám-siā! Ta̍k-ke chài-hōe!
